BAUCHBUMELE USFLUG 2012

...wie jedes Jahr gehen die Bachbumele einwenig auf Reisen.

 

Dieses Jahr  ging es nach Österreich in den Wintersportort Seefeld.

 


Bachbumele Luterbach

 

2 0 1 2

 

 

Helgenverkauf (SBB)

Sit vorletscht Johr do hätte mir

e Helge zum verchoufe,

dä isch so guet mir gloubte ou

dä würdi ganz guet loufe,

hei aus probiert mit skyp und phone

das Ganze macht üs Chummer,

jedes mou chunnt d'Mitteilig

"kei Aaschluss bi dere Nummer"!

 

 

Am Fäudschiesse

Dr Sepp lit hingers Gwehr drückt ab

dr Schuss nit uf dr Schiibe,

bim nöchschte Schuss winkt dä scho ab

kei Träffer cha me schriebe,

ig bi ne Scharfschütz und mis Gwehr

isch wie nes Heiligtum,

nur y dim Auter liebe Sepp

wird jedes Gwehrli chrum.

 

 

Am Seppelitag

Dr Peter Jost isch Spezialischt

im Kaffichrueg bediene,

könnt jede Kniff und jedes Gfäss

e bessere fingsch niene,

dä pumpet, pumpet, drückt uf d’Channe

nüt wot use cho,

wenn d’Pumpi noni drinne isch

de chas haut ou nit go.

 

 

Nit dr Schnöuscht

S’Friedhofreglemänt isch nöi

heis letscht Johr ganz früsch gschriebe,

dr Zuber Hanspi isch mit 20 Johr

Grabesrueh nit zfriede,

s’hät ruehig dörfe länger si

uf 30 Johr hät me söue,

de hät är ändlech ou gnue Zyt

die Grabstei ane z’stöue.

 

 

Gseh nüt

Caccivio Bruno Kassier

vom FC Luterbach,

seit plötzlich mini Läsebrüue

isch mir eifach z’schwach,

s‘Hanni luegt ne a und seit

jetz fosch gloub afo spinne,

y dere Brüue wo jetz treisch

si gar kei Gläser drinne.

 

 

Idee muesch ha

Hesch Hochzytstag wärs

schampar schön

wenn Blueme bringsch dr Frou,

dr Ramel Erich hockt im Pöschtli

dänkt so mach ig’s ou,

es isch scho schpot het Öu am Huet

stoht wacklig uf de Bei,

är schnappt sich s‘Buguet uf em Tisch

und bringt‘s dr Silvia hei.

 

 

Weidebach im Giuffu

D’Froueriege stigt y Zug

si wei uf Reise goh,

d’Mariann isch ou derbi

und het gloub aus mitgnoh,

doch im Zug luegt’s nitzi zue

was ha ig a de Bei

zwe ganz verschiedni Schueh verwütscht

ig sött no einisch Hei.

 

 

Verfahre

Sit letscht Johr wird bis Held’s

a jedem Tag dr Rase gmähit,

ständig gsehsch e Mähroboter

wie dä d’Rundi dräit,

nur einisch fahrt dä Mähier fausch

dä het sich glatt verloufe,

de geit haut s’Vera rasch zum Wyss

go nöi Rose choufe.

 

 

Geben und nehmen

Söttis i dr Schwiiz emou

ängg wärde mit de Chohle,

und Europa müessti üüs

mit Rettigsschirm cho hole,

bechämte si im Gägezug

das ohni schlächts Gwüsse

Chäsliwil, das chöi si bhaute

denn niemmer würd's vermisse

 

 

Wenn’s schmau wird

Priska macht mit Fründ und Hung

Summerferie,

dr Hung im Chorb, e Velofahrt

ume Gardasee

uf der Brügg muess uswiiche

dass es git kei Schaade,

geits Priska, s'Velo und dr Hung

uf diräktem Wäg go baade.

 

 

Us dr Zytig(e 7 Fache Pleitier)

Im Bärepark dört wär normau

e Bär in Aktion,

sit letscht Johr gsehsch jetzt dört jedoch

e nöi Attraktion,

zwüsche Bäre, Böim und Gheg

hocket näbem Weiher,

am Aeby Dominique si ganz

privati Pleitegeier.

 

 

Öko-Mähtechnik

Der Schultis Bernd het um si Hütte

Magerwiese gsäit,

leider het är gar kei ahnig

wie me d'Wiese mähit,

drum haget dä sis Grundstück y

und lot zwöi Ross lo cho,

die frässe s’Gras und tüe dr Dünger

hinge use lo.

 

 

Käsekuchen à la Lucie (ei du schöne)

S‘Schläfli Lucie - bacht mit Gnuss

e Chueche weisch - mit Chäs aus Guss

gli isch es brun - das chäsge Gmisch

dr Teig lit gäng no - uf em Tisch

im Chuechebläch - isch nüt aus Chäs

kei Teig dri do - ganz im vergäss.

Sisch nit so schlimm – heis chönne ässe

zum Glück nit no – dr Chäs vergässe.

 

 

Strassenkegeln mit Blumenthal‘s

Au 100 Meter - schteit ar Schtross

e Hydrant – faus Füür bricht los

wird die Distanz – ganz plötzlich dopplet

isch s’Daniela – düre ghobblet

Sie het s'Gfüehl - jo, eine minger

s'het eh jo zvöu - vo dene Dinger.

Wenn‘s jetze fahrt mit – sir Limusine

nimmt d’Füürwehr all – Hydrante inne.

 

 

Heiligi Schtroffe

Dr Friedensrichter - sig gloub nöi

dr Fluri Mani - üs nüm treu

dr Zoller Phipu - heig das Amt

und sini Stroffe - imposant

bruchsch nümme Gäud - sig Firlefanz

jetz bätisch 10 mou - Rosechranz.

Wenn’s dir nit passt – isch är kulant

machsch haut es haub Johr - Ministrant

 

 

Standschäde

Dr Rüfenacht – Chef Veterane

macht e Marsch – mit Kamerade

dr Räbewäg - wird abmarschiert

am Peter d’Schueh – gli ramponiert

dä fluecht und macht ganz langsam schlapp

am Schueh gheie - scho d’Sohle ab.

Bärgschueh kaputt – das isch bitter

är louft haut uf - de Socke witer.

 

 

Autoproblem

En Ahänger – as Auto wot

dr Willi gseht – es Agebot

dä wird grad kouft – ihm gfallter drum

dr Pris sig billig – nüt isch chrum

är zaut das Gfährt – jetz lueg dä schmarre

ha gar kei Kupplig - a mim Chare.

Jetz chunt dä gäng – enorm is Flueche

muess schteht‘s es Outo – mit Kupplig sueche.

 

 

auti Fähne

Verblichni Farbe - d’Side grisse

Löcher im Wappe – d‘Egge verschisse,

so geit me nit - a ne Bestattig

das macht doch ganz – e schlächti Gattig

das weiss doch jede – gross und klein

nur nit d’Fahne – vom Turnverein.

Die Fahne steit – totau im Schüuf

die nimmt nit mou – no d’Winterhüuf.

 

 

Dr Dani nach em Match

Dr Cattin chunt - am Fritig hei

vom suffe zimmlich - Schlig im Bei,

Hunger het är - isch vüu gschprunge

nach Gummibäärli - suure Zunge,

igschloffe isch dä - no bim schmatze

verchläbt am Morge - sini Tatze.

Sisch schampar stüu - me chä nüt ghöre

verchläbt isch ou - si grossi Schnöre!

 

 

Dr fausch Kanischter

Caccivio Kurt – spaltet sis Holz

no ganz elei – druf isch är stolz,

doch Spaltmaschine – isch nit ihm

louft plötzlich nüm – kei Moscht meh drinn,

nimmt e Kanischter – füllt dr Tank

doch dr Motor – macht kei Wank.

dr Kurt wird auso – ou nid jünger

statt Bleifrei tankt dä – flüssig Dünger.

 

 

Bruno’s Nachtiöbig

Bim Colombo – hornt’s wie wüud

mitt’z ir Nacht – är nit im Büud

ir Nochberschaft – isch aues wach

was macht äch blos – e so ne Krach

Alarmalag? – dir chöit ou dänke

vor Johre tuen - ig die abhänke.

has säuber gmacht - ha wöue schpaare

jetz muess ig haut - dr Tschugger zahle.

 

 

E lockeri Schruube (Henry Valentino, Im Wagen vor mir)

Dr Jordi fahrt nach Pizzabache hei zue

dr Aahänger am Outo hingedrii

doch glii druuf aabe rumplets und es macht e huere Krach

mit ruehigem Outofahre isch's verbii,

het Bräms vergässe z'lööse

am Aahäänger

d'Räder hets ganz gruusig fescht blockiert

dr Gummi het's abgrisse

s'Rad isch amne Rumpf

das muess ig wächsle

dänkt är ganz schockiert.

Jordi - du weisch doch worum

ou um ne Fäuge - ghört e Gummi drumm.

S'Resärverad isch säuber ou nid mitchoh

so muess är mit em Outo z'erscht mou hei

doch glii druf chunt är wieder

schafft bim Wächsu zügig zue

ig bi ne Siebesiech, cha das elei,

bim witerfahre luegt är usem Fänschter

do wird är vomne Rädli überholt

das Ding isch schlächt montiert gsi

und röuelet dervo

mit Müeh und Not het är's wieder iigholt.

Jordi - mach doch z'erscht e Tescht

ob s'Rad ar Achse würklech

ou het fescht.

Das Rad muess wieder ane ohni Zwiifu

doch d'Schruube fingt är

würklech niene meh

ir Not nimmt är vom angre Rad

drei Schruube mou ewägg

die gschiid Idee

die tuet jo niemmrem weh,

so fahrt är jetz im

Schnäggetämpo hei zue

mir könne d'Moral vor dere Gschicht

mängisch het är d'Bräms aazoge

oder Schruube locker

und mängisch isch är eifach

nid ganz dicht.

Jordi - lueg mit lache zrugg

nid nur du hesch es paar Schruube lugg

 

 

Wahle 2011 (Mani Matter, Willhelm Tell)

E Schturm, dä hättis söue gäh

uf d'Sitz im Schtänderat,

Blocher, Brunner und dr Amschtutz

schtöh scho schtram parat,

doch s'Volk, das het se niene gewählt

si chöme e chli z'churz,

so bliibt vom grosse Schtöckli-Schturm

nur e laue Furz.

Dr Zuppiger i Bundesroot

niemmer wett ne misse,

är heigi schliesslech nur e Frou

um Batzeli beschisse,

doch glii druuf heis de aui gwüsst

isch König im betrüüge,

dä cha jo no vöu besser aus

dr Blocher d'Lüüt alüüge.

Dr Walter isch dr Retter vo

dr SVP ir Not,

Vor paar Johr het är nid wöue

jetz isch är zvöu im Boot,

doch ou mit Walter giengs nid guet

eher äuä schlimmer,

mir wüsse doch das Thurgouer

au hei längi Finger.

Dr Muurer hanget nid am Job

är würd ou Schtroose wüsche,

är wärdi sowieso nid gliebt

heig Gägewind e früsche,

derbii gseh mir en Arbeit

wo ihn voll würd motiviere,

är chönnt dr Pnödruck vo de Flüüger

aus PUMPI kontrolliere.

So gits übere Bundesroot

gar nüt Nöis zum brichte,

nur d'Calmy Rey seit "au revoir"

e Friburger söus richte,

ir SVP cha i vier Johr

vieles no passiere,

villicht tüe si dr Bloche no

aus Kanditat portiere.

Wies de chönnti choh (i 928 Joohr)

Dr Blocher schteit vor Himmelstür

hässig isch är haut,

dr Herrgott seit, s'isch Zyt für di

bisch tuusig Jööhrli aut,

bisch lang gnue gsi im Parlamänt

drumm bisch jetze gschtoorbe,

ig cha nid warte bis no einisch

Bundesroot bisch woorde,

ig cha nid warte bis no einisch

Bundesroot bisch woorde.

 

 

Nüt (d’Füchsli)

Hei Nächte lang gschtudiert

was mir öich chönnte singe,

was im Abschlusslied

mir gärn wette bringe,

sisch nüt me los i üsem Kaff

das isch e Schweinerei,

lit das äch am Gmeindepresi

Michi Ochsebei,

aus Bänkler schiesst’s eim aa – (pfeiffen)

wenn im Gmeinrot jede meint är

müössi d‘Schnurre ha,

worum worum worum worum worum

isch‘s in Luterbach so rueh.

Ou vor Gmeinsverautig

hei mir gar nüt ghört,

mir wüsse gar nit rächt

schafft no öpper dört,

dr ganz Mittwuch isch zue

si müösse sich erhole,

und am Fritinomittag

tuet sich‘s wiederhole,

hallo, wenn schaffe die – (pfeiffen)

es Burnout überchunsch

uf dere Gmein so sicher nie,

worum worum worum worum worum

isch‘s in Luterbach so rueh.

Vo der Gmeinsversammlig

hei mir ou nüt ghört,

niemer het sich über

irgendwas emou empört,

kei Froge wärde gschtöut

dr Gmeinrot wird nit quäut,

ar Budgetgmein do het

haut ou dr Faccioli gfäut,

keine schnorret blöd – (pfeiffen)

mir Fasnächtler, mir finde Luterbach

doch zimlich öd,

worum worum worum worum worum

isch‘s in Luterbach so rueh.

Vo de Lehrer singe

do schloffsch grad sofort y,

und si mer nächer fertig

bruchsch e Therapie,

denn näbscht de Ferie bruche die

dass si blibe fit,

no seperat e gueti Wuche

schueligs freii Zyt,

wenn üs das würdi glinge – (pfeiffen)

nach sövu Ferie würde mir

dr Arbeitsplatz nüm finge,

worum worum worum worum worum

isch‘s in Luterbach so rueh.

Mir hätte gärn chli meh

Lüüt uf d'Schippe gnoh,

am eint oder angere

d'Hose abegloh,

doch weder s'Gwärb no Beizer

no d'Politik isch Schpitz,

niemmer het mit angerne

ir Öffentlichkeit Chritz,

 

Drum höre mir jetz uuf … (pfeiffen)

und sammle üs für's nöchschte Johr nöie Värsli-Schnuuf,

dorum, dorum

heit dir in Luterbach jetz Rueh

jetz heit dir Rueh!