Verse der Beizenfasnacht

 

 

 

d‘ Grippewäue (SBB)

Dä Winter hei mir Sorge gha

wäg dr Pandemie,

sigs d'Vogu- oder d'Schweinegripp

hei ghofft es höuft Chemie,

mir hätte lieber d'Vogugripp

e Wahl ganz ohni Glanz,

mir hei lieber Flügeli

als en Ringelschwanz.

 

e Schwarzfahrer

Dr Bader Thomy schlüft i d’Schue

wot goh Velofahre,

uf em Dorfplatz trifft me sich

die Schutti-Veterane,

ei Schue drückt ihn, chas nit verstoh

die passe süsch perfekt,

do merkt är dass si Schuelöffel

gäng no drinne steckt.

 

Verwächslet

Dr Jörg isch ganz in Schwarz agleit

är muess a ne Bestattig,

dr Binggeli loht ihn lo warte

das isch doch kei gattig,

hallo Rolf ig wart uf di

grad bim Friedhofhag,

los Toni die Beärdigung

isch erscht am angre Tag.

 

Dä hets verdient

Dr Silvio Berlusconi kriegt

e herte Dom ad Schnure,

doch eigentlech geits ihm no guet

är het gar nüt z'chnure,

wär är ir Schwizer Politik

säge mir ganz barsch,

de hät är schtatt verschlagne Gring

es Minarett im Arsch.

 

 

Dr Berlusconi bluet im Gring

s’het eine nach ihm gworffe,

dr Mini-Dom vo Mailand

het ne voll a Bire troffe,

wär eine vo üs vierne dört

gloubets, sisch nit gloge,

de wär der Turm vo Pisa grad

no hinge noche gfloge.

 

 

Es hout nit

Dr Martin Held das isch e Höud

het letscht Johr Rase gmähit,

mit sim Mähier hin und här

der zue es Liedli krähit,

„Vera lueg die Arbeit a“

die lacht das muesch verdoue,

d’Mässer si verchert montiert

s’het gar rein nüt abghoue.

 

 

Einlochen

Dr Tiger Woods är isch dr King

bim abschloh und iiloche,

doch letscht Johr si am Tiger King

d‘Hormone dürebroche,

si Frou macht ihm sis Hinter heiss

loht ihm gar ke Rueh,

si het s'Gfüehl es längi jetz

18 Loch si gnue.

 

 

S’wird bachet

S’Leuebärger Debi macht

e Torte für e Schatz,

dr Martin Jost freut sich so sehr

es macht bi ihm scho schmatz,

nur d’Füllig wot und wot nit glinge

die wird nit stief bim schlo,

dasch immer so wenn anstatt Rahm

Milch zum schlo hesch g‘no.

 

Google Earth

Die ganzi Wäut, die cha me hüt

uf Guugel-Schtreet go viuwe,

bi üs ir Schwiz fahrt überau

dr Guugel-Chare dure,

nur nöime het's e wisse Fläck

das het für üs scho Schtiil,

das Kaff wo do nid isch erfasst

klar das isch Chäswil.

 

 

Umnutzung

Im Chrüz do hets ke Beizer meh

d'Schpunte die isch zue,

doch es sig nid schtiller jetz

dr Lärm dä git ke rueh,

d'Zimmer wärde buechet haut

ou no zimli fliisig,

isch das d'Filiale jetz

vom Clübbli drüe-drissig.

 

 

Aforderigs-Profil

Dr Schüpbach Kurt üse Huswart

isch Obernarr gsi brav,

ou Obernarr si Schläfli Jürg

und dr Markus Graf,

wenn schaffe wotsch in Luterbach

muesch Obernarr si wahr,

für Gmeinrot z'si, es längt du bisch

e ganz normale Narr.

 

 

Schneefrei

Dr Emmenegger Peter isch

bim Müller Nold am schuffle,

dä Schnee am Trottoir zue muess furt

är chunt fasch chli is jufle,

die Haltestöu muess schneefrei si

es Detail ischs wo stört,

dr Fahrplan het e Wächsu gha

dr Bus hautet nüm dört.

 

 

Eifach nüt

………………………

………………………

………………………

………………………

vom Schwaller Hugo isch dä Värs

das isch unerhört,

euch geits glich wies üs isch gange

mir hei ou nüt ghört.

 

Grossväter-Rally (ei du schöne)

Dr Scheidegger isch Grossvater

das wird me haut y sim Auter,

vou Stolz louft dä jetz mit em Wage

dur jedi Stross doch mues är chlage,

ha Wasserchnöi und immer chaut

ig gloub jetz wird ig langsam aut.

 

Dä Chinderwage isch en Hit

de brucht me dr Rollator nit.

 

E nöie Hung

Dr Rütsche het e junge Hung

isch noni aut, gloub nur paar Schtung,

dä zeigt im sis nöi Hundehus

do inne chasch de mache pfuus,

lit näbe sis nöi Hundeli

und schlofft im Hundehüttli y.

 

Si Frou suecht ihn bis Mitternacht

wos Natel schällt isch är erwacht.

 

Nachtruhe

Aui Mieter flueche z’Nacht

wüu e Fährnseh lärmt und kracht,

dä Übeltäter het me gli

dr Eichebärger Heinz mues si,

si lüte, schreie, telefoniere

nur dr Heinz nit reagiere.

 

Dä ghört nüt, schlofft wie nes Ching

mit Chopfhörer uf em Gring.

 

Waudgang

Dr Eugen Rösch stoht z‘mitts im Waud

wo si die Bürger überhaupt,

niemer chunt es schiesst ihn a

geit hei und luegt d’Iladig a,

läck do über chunsch jo Flöh

ig bi grad just e Wuche z’früh.

 

Dr Waud dä könn ig s’wär jo glacht

doch wo gits jetze gratis z’Nacht.

 

Stange-Bier

Mir hei d’Übersicht verlore

bim Suffe fosch afo motore

wie tüür ischs Bier ig ha e Krise

überall zausch anger Prise

im Saf 3.50 das isch agmässe

ir Chrone meinsch heigsch öbis gässe.

 

4 Schtei zausch dört los Karin-Schatz

du schaffsch nit am Paradeplatz.

 

Blumenthal-Poscht

Dr Geri fahrt y ne Abschrankig

die steit früsch dört het drum kei Ahnig,

s’Gido verchlemmts das macht kei Wank

drei Hälfer chömme Gott sei Dank,

die heble, risse, s’wot nit goh

jetz düe si vorn d’Luft use loh.

 

Dr Töff isch frei das hilft ihm nüt

denn ohni Luft chunt Poscht nüm hüt.

 

S’Fluri Theres

Stoht ir Bäckerei kei Lug

und seit: “äs nähm y jetz dr Zug“,

nach Saas Fee e chli uf d’Schii

heig s’ganze Buff bereits derbi,

im Zug ischs grad am Gipfel ässe

wos merkt ig Dotsch ha d’Schii vergässe.

 

E Funk a Sohn hou d‘Latte hei

die stöh no vor dr Bäckerei.

 

 

 

 

Lübye / (Dr Siddi)

Dr Mohammar Ghaddafi,

Schef vo Lübye

seit - d'Schwizer si Bandite,

wott se rüge

Hannibal, dä Ängu

bi Allah, isch kei Bängu

löht ne frei und höret uf mit lüge.

 

 

In Geiselhaft zwe Schwitzer

wärde gfange

sofort dr Merz

id Wüeschti abe gange

loht d'Geisle dört elei

nimmt nur s'Gepäck mit hei

und d'Schwitzer müesse

witerhin no plange.

 

 

D Calmi Rei wott

d'Geisle go ersetze

Mohammar rüeft

" u f   k e i f a u " vou entsetze

ha Schtürmicheibe gnue

die bringt mi um mi Rueh

Ke Burkha cha die Frise

ganz verschtecke

 

D'Schwyz wott är

verteile in Europa

D'Schwobe, d'Tschingge

aui chöi e chli ha

nur Frankriich macht nid mit

die wei die Wäusche nid

die heige säuber

guete Wy zum suffa

 

Jetz wird haut no chli

Gschtürmt mit Mohammar

doch was dä seit

isch sowieso nit wahr

drum isch es üs egau

für das si mir de z‘schlau

und suffe lieber eis

ar Fasnachtsbar.

 

S' Grümpu und dr Veterane-Usfluug

(hei choh)

Dr Bader Andi isch im Suff

dr fauschi Wäg hei gloffe

im Kreisu isch uf d'Schnure gheit

im Bluet inn d'Schtroter troffe

mit Ambulanze is Schpitau

sammle y d'Schnapsliiche

am nöchschte Tag höuft dr Papi ihm

usem Schpitau schliiche.

 

Jetz isch gnue -hei go, hei go,

hei goh nach em Turnier,

kes Wunger geits euch nümme guet

nach söfu Wii und Bier.

 

Dr Kofmäu Hugo isch guet druff

macht e huufe Faxe

d' Maya seit ig tue di hei

ig schpiele dini taxe

dr Hugo schtigt zum Outo us

und tschöuperet erbarme

a Schtöu vom Thesi nimmt är haut

dr Briefchaschte i d'Arme.

 

Jetz isch gnue -hei go, hei go,

hei goh nach em Velöle,

söfu Bier tuet nümme guet

höret uf mit gröle.

 

Somaini Franz ir Schtube schteit

het ke blasse Schimmer

wie chume ig im Suff ächt bloss

is Bett y mim Schlofzimmer

Canonica schteit vor dr Wohnig

s‘ Schloss bringt ihn ihn Rasche

är schtoht vor dr falsche Tür

i dr falsch Etasche.

Dr Liibundguet gheit ab em Rad

landet uf em Rügge

eleini chan är nümm ufschtoh

dr Alk het sini Tücke

näbe ihm lit Fluri Schorsch

dr Max är cha scho protze

ihm tuet nur dr Ranze weh

dr Schorsch dä mues no (hueschte)

 

Dr Schläfli Remo wot ufs Klo

d’Blase duet ihn plage

tschülperet y Deichsle dry

vom Fäudschlössli-Chiöuwage

nach einer Schtung scho wieder Druck

nimmt die glich Passage

Deichsle isch no immer dört

d’Schienbei si verschlage.

 

Jetz isch gnue -hei go, hei go,

hei goh nach em Turnier,

kes Wunger geits euch nümme guet

nach söfu Wii und Bier,

jetz isch gnue -hei go, hei go,

hei goh nach em Velöle

söfu Bier tuet nümme guet

höret uf mit öle.

 

 

D’SVP (d’Füchsli)

 

D'Parteielandschaft het

z'Luterbach scho gwunne,

neu git's jetze grüeni

mit lachender Sunne,

das isch natürlech toll

für d'FL-Mitglieder,

die meischte gseh sich jetz

bir SVP wieder,

 

s'Bishärige verbii (pfeifen)

de geit me haut zur SVP

die sammle aues ii.

 

Worum worum worum worum

worum worum worum,

het SVP ufschwung?

 

Ob roti, schwarzi, gäli

die hei dört es dehei,

dr Toni Brunner chunnt

loht d'Schöfli nid elei,

bim heigoh wird's prekär

het dr Toni sich verfahre,

im Schache usse glandet

bi de Schwarze-Gott bewahre,

frogt ein wo chrischtlech dänkt (pfeifen)

mir hätte ne dür's Fahrverbot

im Ämmeschpitz versänkt.

 

Worum worum worum worum

het SVP ufschwung?

 

Is Pfarreiheim si si gange

wäre gärn id Chöuche drii,

doch ohne Vater Blocher

do fäut dr Heilgeschy,

dä chunnt nümm uf Luterbach

är tuet sich guet verschtecke,

sit är im Attisholz het gwürkt

isch d‘Bude am verrecke,

 

dr Guru är chunnt nid - pfeifen

dä het in Luterbach bis jetz

uf nüt meh appettit.

 

Worum worum worum worum

het SVP ufschwung?

 

D' FL und dr Schumi

das isch bald verbii,

Doch mit dr SVP

chunnt e neue Player drii,

Luterbach wott nümm

hai teggnolodschi,

in Luterbach chöis wieder

es Dotze Buure sii,

 

die aute Brüef si inn - pfeifen

im Mäucher, Heuer, Kutscher,

do isch Zuekunft drinn.

 

Worum worum worum worum

het SVP ufschwung?

 

D’Füürwehr isch ir SVP

richtig guet verträtte,

Aus Füürwehrkaderma

bisch nid linggs und nid e nätte,

doch si griiffe sicher

bi jedem Grossbrand ii,

lösche nid nur Buurehööf

ou üsi Heimetli,

 

das isch e gueti Sach – pfeiffen

bir SVP isch öppe mou

so richtig Füür im Dach.

 

Worum worum worum worum worum worum worum

het d’SVP ufschwung?

Die het ufschwung!