2009


 

 


Verse

 

 

 

 


z’spot (SBB)

Dr Summer Jörg isch e Beamte

s' wird immer e so loufe,

hät är doch dr Uftrag gha

Helge go z' verchoufe,

für's Rössli Hochzyt 100 Schtutz

drunger geits nid minder,

doch bis är chunnt isch aus verbii

d'Scheidig die isch gschwinder.

 

Abbruch-Hüser

Dr Bader Kurt, Baupräsident

seit s'Bäckerhuus mues wäg,

dr Abbruch isch e schnäui Sach

s'git gli e lääre Fläck,

die Hütte vis à vis ou furt

die isch würklech schlimm,

dr Bader seit, „löhts jo lo schtoh

mir wohne do no drinn“.

 

So schaad

D'SBB het neui Züg

vo Oute bis uf Bieu,

öppis isch a dene Züg

wo üs gar nid gfieu,

s'Abwasser louft jetz y ne Tank

die hei doch e Macke,

jetz chöi mir nümm dür's WC-Loch

uf Chäswil abe kacke.

 

Immer bsetzt

S‘Hushautigsgäud tuen ig dir schtriiche

ig ha jetze gnue,

immer bsetzt dis Telefon

hesch du de gar nüt z'tue,

dr Otto mit em Mitzi schimpft

är söt si Frou nid quäle,

dr Löli tuet si eigeti

Natelnummer wähle.

 

 

Yes, we can

Barak Obama, Presidänt

vo der U S A,

im Wiise Hus tuet dä guet

bringt Schwung, dä farbig Ma,

wenn de dr Schumi ändlech furt

Ochsebei chasch plaane,

villecht chunnt ou in Luterbach

emou e Schwarze aane.

 

 

EU-Füürz

Jede Aff frisst si Banane

de Hüng längt scho e Chnoche,

es Ros het Haber und für d’Söi

Härdöpfel duesch ne choche,

e Chue frisst us dr Chrüpfe Gras

bis si nüme mah,

nur d'Schwizer wie Exote-Därm

für ihri Cervelat.

 

 

Üsi Beize

S’Safari sig jetz wider off

und s’Chrüz das geit gli zue,

ir Chrone blibts grad so wies isch

dr Hügu dä het gnue,

im Pöschtli isch e nöie Wirt

so läng wie rund nid minger,

är sigi de dr Presidänt

vo de Sumo-Ringer.

 

 

Bis Colombos

Dr Bruno seit zum Libundguet:

„los Peter jetz muesch cho“,

und dä Marder y mim Chäuer

ändlech öbbe foh,

mir chöi nüm schloffe bi däm Krach

nit ig und ou mi Schatz,

das Tier isch hurtig gfange gsi

sisch blos die eiget Chatz.

Dr Eichebärger (ei du schöne)

Go poschte geit dr Heinz y Denner

e Cognac bruchts, weisch dä für Kenner,

bim Gmeindshus no s‘Altglas entsorge

jetz ha ig d’Arbeit gmacht vom Morge,

deheim a cho wird gsuecht und gsuecht

wo isch dä Cognac jetz verfluecht.

 

Dr Schnaps isch wägg und läär isch Täsche, im Autglas ligt, e tüüri Fläsche.

 

E fausche Lieferort

Dr Ollie isch e liebe Ma

s‘Pirateschiff das dörft dir ha,

seit de Büetzer stöuet das

bi mine Chinder mitts is Gras,

die lade uf, d’Ching nit lo warte

und stöue s’Schiff y Chindergarte.

 

Die Gärtner wüsse eis haut noni

au‘ Ching si nit vom Schläfli Ollie.

 

Nit Überleit

Wenn’s Garaschiifahrt füllt mit Räge

hesch es Problem, das cha dr säge,

irgend öbbis louft nit ab

s’Wagner Sonja die winkt ab,

die höchschte Stifu duets montiere

und ar Garaschtür handiere.

 

Dr Rüedu rüeft „machs nit liebs Mami“

sisch z’schpot, im Hus gits e Tsunami.

 

Grössewahn

dr Luschtebärger brucht chli Stroh

6 Baue, „Flügu säg mer wo“,

bi Nacht und Näbu wott dä de

das bschtöute Stroh go uflade,

dr Kürtu chnorzet wie ne Bär

werum isch blos das Stroh so schwär.

 

Was du do latsch, muesch gar nit lalle

das si grossi, Siloballe.

 

Dr Campingplatz

Ar EM gits Fuessball-Ahänger

wos Zäut mit näh im ne Ahänger,

e Platz zum Campe, bruchts jetz no

dr Kaiser Mani meint:“ jo do“,

mi Umschwung isch für das perfekt

wo‘s Cämper gseh si die erschreckt.

 

Uf däm Zäutplatz, hei die gsuecht

he Mani los, dä isch usbuecht.

 

Ar Gwärbusschtelig

Autiise wird dört ane treit

es Kunschtwärk drus langsam entschdeit,

wo hi dermit me weiss es noni

mir schtöues fangs zum Bernasconi,

für e Schrott gits hufe Gäud

scho gli drufabe hets haut gfäut.

 

Dr Roni bichtets, dr Chopf isch gsänkt

dass das Kunscht isch, hät ig nit dänkt.

 

Nimms ruheig

Dr Schönmann Ueli isch am johle

e Roller wot ihn überhole,

das git ihm haut dr Gring nit zue

dä füre z’loh hät nie me Ruhe,

är wehrt sich geit a sis Limit

bis dise uf em Rügge lit.

 

Sit här bi Rönne nur no zweiter

denn s’Velo isch si nöi Begleiter.

 

E tüüri Zigarre

Dr Gwärbverein, dä het es Fescht

im Wilihof mit huufe Gescht,

dr Hediger het nach em Gricht

e wäuts Zigarre mitts im Gsicht,

plagiert und seit „die isch de tüür“

d‘Alarmalag mäudet es Füür.

 

D‘ Füürwehr seit de, “liebe Kurt

schiess dä Schtumpe jetze furt.“

 

Im Pup verirrt

D’Verwautig und dr Wärchhof fiire

s’Wiehnachtsfescht, die meischte liire,

näbscht em Ässe gits jo dänk

alkaholischi Getränk,

dr Richard Hermann wet gärn hei

doch Türe fäut im Pup vom Thai.

 

He Reto hüf mer, s’wot nit glinge

ig cha dr Usgang nüme finge.

 

Mir vermisse Di

Dr Dreier Othmi isch nüm do

muesch ir Poscht nüm Schlange stoh,

ou Grüenschnäbu die si verschwunde

mir hei das Fähle überwunde,

wenn s‘Gschnorr vom Dreier

jetz wosch ghöre

muesch ne haut Deheim go störe.

 

Ei Vorteil het’s es isch schön Ruhe

muesch d’Ohrepax nüm ine tue.

Die fauschi Beiz

Dr Simon Friedrich isch erschreckt

ir Chrone isch jo gar nüt deckt,

ha telefonisch reserviert

und aui Gescht do hi zitiert,

Tisch si schnäu deckt und zämme gschtosse

und s‘git sogar no Fleisch mit Sauce.

 

Dä Simon isch e chline Süchel

denn reserviert het är bim Büchel.

 

Und wäg däm Bock nid Umsatz gnue

drum macht dr Büchel jetze zue.

 

 

Am Kurt si Idee

Caccivios Weiher dä isch dicht

verschlosse dür ne ischig Schicht,

die arme Fisch für die isch schlimm

s'Wasser chaut kei Heizig drinn,

es Loch is Isch ig lueg jetz chli

und schtecke ne Touchsieder dri.

 

dr Sieder heiss darf's nid vergässe

süsch tüe mir de Fischsuppe ässe.

 

 

 

Dr Flury und dr Jordi (ewigi Liebi)

Am Rössli-Fescht git's Bier,

s'isch gratis gsi,

zum Suufe hei si glaade,

dr Flury Max nimmt Glas um Glas

diräkt vom Fuehrme-Waage.

 

Dr Jordi chunnt und seit,

Max gang go schaffe

und hör jetz uf mit schlücke,

süsch chönnt me meine du sigsch fuu

und wöusch di vor Arbeit drücke.

 

Elände Schtürmi, loh mi lo si

du bisch e Sürmu, lueg du für di

elände Schtürmi, mach du doch lei

du bisch e Sürmu, gang du doch hei.

 

Dr Flury seit, ou wenn ig bsoffe bi,

Gschäftli tuen ig mache,

e so blöd wie du bin ig nid

ab dir mues ig nume lache.

 

Do wird dr Jordi Beat schtärnsverruckt

seit: „Flury, bisch e Wicht“,

und läärt am Flury Max mit Schwung

sis ganze Bier is Gsicht.

 

 

elände Schtürmi, loh mi lo si

du bisch e Sürmu, lueg du für di

elände Süffu, haut du dr Latz

mitts i dim Gsicht inn,

e huufe Bier het Platz.

 

 

Bundespolitik (über den Wolken)

Dr Couschpin hockt im Sitzigszimmer

lacht über d’SVP wie immer

begrüesst erfreut dr Christoph Mörgele

wünsche schöne Tag Herr Mengele

do mäudet sich dr Toni Brunner

auso Pascal das isch gschpunne

dä Ma het zwar es Handicap

aus Zürcher bisch e Depp.

 

„He Leuthard Doris“ seit dr Toni

chum doch Morn mou oben ohni

e biz Abwächslig tät üs guet

und du hätsch doch glatt dä Muet

i mir Partei hets gar kei Frou

e so charmant, es isch nit gloge

und d’Eveline Widmer-Schlumpf

chan ig doch nit froge.

 

Bi üs im Bundeshus

si mir mängisch so luschtig und zwäg

si gäng fründlich und lieb zu e nang

hei keis Hirni, chum e Verstang

so isch‘s haut i der Politik

immer fründlich und chic.

 

 

 

Es zwöier Ticket me chas ahne

stöut SVP bi de Wahle

dr Blocher wär de s’Nummer-Eis

am Murer Stimme wärs nit weis

eigentlich ischs doch egau

s’Parlamänt het gar kei Wau

wäusch dr Blocher ischs e Hohn

stimmsch am Ueli wäusch si Klon.

 

Dr Murer het die Wau de gwunne

ei Stimm meh das isch gschpunne

die Rote und die Grüne gränne

öbbis gäbs de no z’erwähne

dr Ueli Murer das isch wahr

isch für die Lingge nit tragbahr

bir nöchschte Wau wird’s wieder knapp

de wähle si dr Ueli ab.

 

Bi üs im Bundeshus

si mir mängisch so luschtig und zwäg

si gäng fründlich und lieb zu e nang

hei keis Hirni, chum e Verstang

so isch‘s haut i der Politik

immer fründlich und chic.

 

Dr Moritz seit zum Rudolf Merz

gäu das isch doch e Scherz

dä Murer isch kei Bundesrot

ig wot dä nit i üsem Boot

und zue däm geits ou gar nit uf

e so Problem nä mir dr Schnuff

mit vier Manne, weisch das gsehn’i

het‘s ei Frou doch zweni.

 

Dr Ruedi merkt de üse Moritz

dä cha jo Rächne wie ne Blitz

nimm doch du mini Finanze

und ig ligge chli a Ranze

ig muess mi sowieso no schone

s‘Härz und erogeni Zone

und würd no luege zu de Biene

em Doris, Michlin, Eveline.

 

Bi üs im Bundesrot

geits haut würklich nüme so schnäu

möge nüm sisch doch kei Schang

ou scho öuter es Herbschtet scho lang

mänge seit mir sige Antik

so isch’s ir Politik.

 

 

D’Chummerbuebe (d’Füchsli)

Üsi Chummerbuebe vo dr freie Lischte,

hei i dere Gemein wöue use mischte,

sie si doch ganz klar die politischi Elite,

nume si hei rächt

muesch gar nid mit ne schtritte,

 

jetz geits nümm so ring, (pfeiffen)

jetz gits mou vom Räschtgmeinrot

öppe eis a Gring,

 

worum worum worum worum worum

loufts ir FL chrum.

 

 

Jetz wärde si sensibu üsi herte Kärli,

sie heige nüt rächt gmacht

das isch doch es Märli,

niemmer wot se tröschte

das het se doch sehr troffe,

derbi hei si aus Erschts

mit Dräck ume geschosse,

dr Schpiess dä macht e Chehr, (pfeiffen)

sit neuschtem setze z‘Luterbach

sich d'Opfer ou zur Wehr,

 

worum worum worum worum worum

loufts ir FL chrum.

 

Sie hei wöue boue goudigi Brügge,

finanziere uf em

Schtürezahler-Rügge,

sit der Hugo isch der Scheff

im Gmeinderot,

gits in Luterbach

nur no Wasser und chli Brot,

 

es geit nur no bärgab, (pfeiffen)

in Luterbach wird nid nur s'Salz

zum Schtreue knapp,

 

worum worum worum worum worum

loufts ir FL chrum.

 

Söi-Hafe und Söi-Dechu

das mache si nid mit,

soo öppis z'bhoupte

das isch nid würklech hipp,

dr Hugo, är bliibt schtandhaft

steit für Ornig und Rächt,

es angers Rächtsempfinde

das verschteit är schlächt,

 

doch wär wott de scho, (pfeiffen)

mit de Chummerbuebe

ungre gliche Dechu goh,

 

worum worum worum worum worum

loufts ir FL chrum,

es louft chrumm.

 

Jetz si aber Wahle

mir wüsse was du meinsch,

isch äch in Luterbach

„time for a change“,

ob's e Wächsu git

das schteit no niene,

au hei die Regierig wo si tüe verdiene,

 

was es ou tuet bringe, (pfeiffen)

mir wärde nöchscht Johr wiederum

es Liedli drüber singe,

 

dorum dorum dorum dorum dorum

wird's üs nie z' dumm,

s’wird nit z’dumm.