2006

Rösslifescht
Rösslifescht


 

 

Verse

 

 

 


 

Sisch zum möögge(SBB)

hei’s immer gseit, hei’s immer gwüsst,

hei ou scho dervo gsunge

hei immer bhoubtet, s’ isch e so,

das ganze isch nid glunge

mir hätte chönne Wette druuf,

dass dem e so ischt

am Wittwer Max si Lampeplatz,

das isch e huere Mischt.

 

s’Hundeverbot

Dr Pit-Bull söu verbote wärde

är isch eifach z’gfährlech,

Dr Leuenberger Moritz seit

und das meint är ehrlech,

verbiete söttsch no anger Kläffer

bissig wie ne moore,

mir zeige euch es Bild vom Biescht

am gschiitschte eis vo voore.

 

Du Turk

Panik herrscht am Bosporus

d’Gränze wärde gschlosse,

mit Panzer und Maschinegwehr

Vorsicht; es wird gschosse,

d’ UNO die isch ou besorgt

es isch de Türke z’viel,

dr Aagriff, dä isch eifach z’schtarch

vom Schwiizer Fuessballspiel.

 

N5H1

D’Vogelgrippe macht üs Angscht

es droht en Pandemie,

Stallpflicht herrscht für alli Vögu

leider muess das sii,

Doch eigentlech isch das nid schlimm

die Türe bliibe zue,

de hei mir vo Chäswiler-Vögu

ändlech üsi Rueh.

 

 

Dr Bürogummi

Is Wallis fahrt dr Schläfli Urs

und ladt dr Charre y,

in Kanderstäg uf d’BLS

das dörft de s’billigscht sy,

nur eis das mues är ou no lehre

s’Yvonne meint hätsch söue,

das Zügli do das fahrt mit Strom

dr Chlapf dä darfsch abstöue.

 

 

Im Schützehuus

S’geit nüm seit s’Schüpbach Yvonne

und meint s’Chlikalibergwehr,

drückt ab doch us em Louf kei Schuss

äs ärgeret sich sehr,

drei Profis näh das Gwehr vo nang

und luege deppelt dri,

nüt defekt sisch nämlich nur

dr Abzug gsichret gsy.

 

 

Ähnlichkeite

d’Merkel isch e dütschi Frou,

dr Schwaller isch e Schweizer,

d’ Angela macht Politik

dr Hugo dä isch Beizer,

doch eis, das hei si beidi gliich

und das isch es malheur,

d’Merkel und dr Rössli Hügu,

die hei dr gliich Guafför.

 

 

Schnäu, schnäu

Dr Pfarrer Wäber het’s pressant

und fahrt so rächt im Schuss,

am Eichebärger Franz doch glatt

i früsch kouft VW-Bus,

sisch nit so schlimm meint de dr Wäber

fasch e chli ironisch,

ig gseh öich hüt zum erschte mou

de sit dr gloub katholisch.

Für d’Chatze

Dr Zuber Kurt dä liebt so sehr

es rassigs sämigs Fondü,

drum streut bim rüere s’Uschi

Paprika i das Chäs-Menü,

s’Decheli gheit ab dr Dose

dr Paprika y Chäs,

dr Kurt schiesst aus zum Fänschter us

s’Fondü mit samt em Gfäs.

 

E Spetzielle

!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!

!!!!!!!!!!!!!!!!!!!!!!!!!!!!!!!!

das isch üse Bitrag gsi

zu de Gmeinrotswahle.

 

Färnseh luege(ei du schöne)

Dr Papscht isch letscht Johr leider gstorbe

Im Fährnseh chunnt’s bis töif i Morge

Ou Truurfier wird de übertreit

S’Moser Vreni luegt das Leid

Ir Chuchui dämpft de s’Mittagässe

Aus verbrönnt chasch’s nüme frässe.

 

Mit Rüebli, Sel - leri und Louch

Macht s’Vreni scho dr schwarzi Rouch.

 

Ir Nacht

Dr Schläfli Othmilitt im Bett

tröimt wie är friüecher

tschuttet het

dr Müller Otti spüut e Flangge

dr Othmi duet sich türe tanke

e Kopfbau prätsch a d’Bettkomode

erwacht lit uf em Zimmerbode

 

Ir ganze Hütte heig das prätscht

Und het derbi no d’Rüppi quätscht.

 

Fausch gluegt

Dr Rüfenacht brucht schampar Wasser

dr Peter rächnet wird gäng blaser

12'000 Qubik hei mir bezooge

das cha nit si, sisch sicher glooge

verwächslet het dr Peter nur

Gaszähler mit dr Wasseruhr.

 

40tusig Stei hät das ihn koschtet

mit däm hätsch hufe Stange poschtet.

 

Es chlises Outo

Mir hei en aute Charre gseh

en Oltaimer schön wie ne Fee

doch d’Strosselag die git üs z’dänke

das lig am Schoffeur wo duet länke

dä Alfa fahrt ganz schreg und bockt

wenn dr Schlumpf dri inne hockt

 

dr Schläfli Beat het z’vüu Pfund

das är is Truckli ine chund

(är duschi jetz mit Vaseline

de bringsch dr Schlumpf y Charre ine.)

 

S’lätze Zimmer

Dr Bader Andi trinkt vüu Bier

ir Nacht verjagt’s ihm Blose schier

im Hotelzimmer umewandle

fingt Türe nit jetz muess är Handle

churzer Hand zum Fänschter us

dä Seich mach ig haut jetz vorus.

 

Bim zrug goh s’fausche

Fänschter breicht

isch s’Näscht haut bsetzt,

derfür isch gseicht.

 

Is Usland

S’Steblers fahre ganz freiwillig

is Dütsche dört sig alles billig

doch ar Gränze stoppt se d’Schmier

die wei rasch gseh d’Fahrzügpapier

Herr Stebler Dir müesst retour goh

Am Outo fähle d’Nummero.

 

Dr Sohn die Bläch uf Basu brunge

Dä billig Ichouf isch misslunge.

 

Wenn’s glatt isch

Dr Rüetschli Sepp het gäng Pikett

und bringt nach Solothurn Brikett

am Stutz parkiert ladt Kohle ab

wo d’Ladig fäut rütscht s’Outo ab

e Satz a Stossstange wodt stope

„aus wäg“ghörsch lut dr Rüetschli hope.

 

Dr Sepp und s’Outo wie ne Bob

Ir Gartemuur hei beidi stopp.

 

Es grosses Füür(Lion King)

Am erschte Auguscht, do brönnt

bim Flüügu bim Buurehof es Füür,

es git Alaarm und d’Füürwehr chuunt

es isch ne nid ganz ghüür,

Mit Sirene und Blauliecht fahre

die Helde uf e Platz,

Dr Rüetschli Seppu und Flügus Buebe

hei e dumme Latz.

 

da düü, da düü, da düü da düü da doo

zum lösche vo däm Füür si mir hüt choh.

 

Blöödi Lööle und dummi Sieche

so chas nid wyter gooh,

Si hei mit Wasser dämm grosse Füür

e jede Suurschtoff gnoh,

es mottet gäng no und rouchnet gruusig z’vüu für üse Buur,

är wott id KEBAG, doch die wei’s niit,

jetz isch dr Flügu suur.

 

da düü, da düü, da düü da düü da doo

ir KEEEBAG wei si nüt wüsse dervo.

 

Är kippt die Räschte vom grosse Füür

uf en auti Platz oh gruus,

Am Nochber schtinkts jetz vor dr Hütte

nun flippet dä ou uus,

D Füürwehr chunnt mit em Präsi Hugo fertig isch jetz klöönt,

är isch doo der richtig Maa

är isch’s aazünte gwöhnt.

 

da düü, da düü, da düü da düü da doo

dr Huugo isch zum Füürli mache choh.

 

Mir löh dä Huufe jetz lo brönne

de isch dr Räschte wäg,

bim Flügu no nes Excüse

das muess so si, kei Gägg,

do rüeft dr Held zum Chaare us

und niemmer isch ganz froh,

was machet denne dir Aarschlöcher

hüt scho wieder do.

 

da düü, da düü, da düü da düü da doo

fahret ab, dr Hugo, dä cha choh.

 

Nach dere Pleite, es isch verruuckt

e Füürwehr voll Komplex,

schpände tüe si dr Füürwehrsold

dr Geemeinde-Schpitex,

Und d Moral vo dere Gschiicht

die isch verzellt ganz glii,

wenn dr Hoof vom Flügu bröönt

de löh mir s’Füür loh si.

 

da düü, da düü, da düü da düü da doo

wenn’s bim Flügu brönnt mues niemer goh.

 

S’Bougwärb (si hei dr Willhelm Tell)

In Luterbach, do hei mir vier

es Hüüsli wöue boue,

doch welem Architekt wei mir

die Boute aavertroue,

dr Bütler macht es Schlössli druus

bim Ochs gseht aus gliich us,

bim Jeker git’s e Schuehkarton

bim Schuemi fingsch nümm druus.

 

Dr Uushueb macht üs d’ Firma Tschanz

dr Chef isch gäng derbii,

nach dere Locherei frogt är

darf’s de no chli meh sii,

dr Bernasconi bout das Huus

das macht üs keni Sorge,

chunnt dr Rony nümme druus

chan är dr Vater frooge.

 

Dr Wasseraschluss macht dr Ehrsam das isch doch kei Schläck,

är schtoht mit sine Sandalette

bis zum Chnöi im Dräck,

Dr Ruedi Kurth macht d’Schnitzelheizig chrampfe und kei blaue,

d’Schnitzel für zum Füüre chasch

bim Borregaard go chlaue.

 

D’ Elektriker die hei mir gfrogt

es Aagebot üs z’mache,

en Apotheker het das grächnet

üs isch nümm zum lache,

d’Schnider-Giele wette gärn

es würdi no meh choschte,

de chönnte Sy a ihrer Stross

no s’33i poschte.

 

IHD misst d’Fäischter us

und lieferet dr Rahme,

Schiibe het’s no keni drinn

die chöme scho no aahne,

Plötzlech chlöpfts und schärbelets

e Schtei, mir si schockiert,

ir Zwüschezyt het Scheidegger

die Schiibe ou montiert.

 

D’Fassade wird am Lüthi gäh

e Katholik erkoore,

mir müesse eifach sicher luege

das är nid schwarz tuet moole,

für’s Dach hei mir dr Sohm beschtimmt das git im Dorf kei Krach,

är heigi schyns scho aues deckt

de deck ou üses Dach.

 

Schpängler Büez im Winter mache

aues Quatsch mit Sosse,

denne muess dr Richard Wäutu

Dysli’s Pflueg go schtoose,

aus Plättlilegger git’s dr Rüetschli

muesch aber nid flueche,

het är kei Zyt de geisch ihn schnäu

bim Tschuttiplatz go sueche.

 

Dr Schaller Schriiner bringt üs s’Holz

är sött nid vergässe,

E chly z pressiere, süsch hei d’Würm

das Holz vorab wäg gfrässe,

Jeker, Probscht bout d’Chuchi ii

verdelli no vöu schlimmer,

Im gliiche Ruum wär vorgseh gsy

üses Badezimmer.

 

Jetz wo mir wüsse was mir wie

göh mir zu dr Bank,

Die luege üs ganz komisch a

und lache sich fasch chrank,

Die dänke sicher d’Hüpothek

vermöge mir nid z’zahle,

Denn schliesslech si mir, lueget mou

ganz eifach Fasnachts-Naare.

 

S’isch tragisch (die kleinen Wölfe)

Wo mir no chli si gsy

hei mir im Tenn inn g’schpöut,

im Chuehschtau inne hei mir

d’Fuettertrög uufgföut,

mit dr Müuch id Chäsi

nüt hei mir vergässe,

hei derfür ir Chuchi

dörfe z’Nüni ässe.

das isch üs nümm vergönnt, (pfeifen)

im letschte Johr isch üses Rössli aabebrönnt.

 

worum,worum,worum,worum,

isch s’Rössli aabebrönnt.

 

Hei mängisch nach em schaffe

e Laaferi dinn troffe,

e huufe seich verzöut

und mängi Schtange gsoffe,

e mänge het jetz hüt

das müesst dir eifach gseh,

nach em Brand vom Rössli

e kes deheime meh.

z’obe chasch nümme furt, (pfeifen)

s’Rössli isch nur Äsche und e hufe Schutt.

 

worum,worum,worum,worum,

isch s’Rössli aabebrönnt.

 

Ob eine isch e Büezer

e Bänker oder Räntner,

ob Jasser oder Gaffer

wiegsch du gar e Zäntner,

aui Lüt die hei im Rössli inn e Platz,

mängisch geisch eleini

mängisch mit em Schatz.

es wird nie meh sy, (pfeifen)

jetz isch die Zyt vom Rössli ou für üs verbii.

 

worum,worum,worum,worum,

isch s’Rössli aabebrönnt.

 

Hei mängisch über s’Rössli

es Witzli chönne mache,

dr Hugo muess dra gloube

über s’Angie lache,

Am zwöufi wär die Beiz

ordentlech zue gange,

mängisch isch am sächsi

s’letschte Liecht uusgange.

bim jasse tüe’s wie d’Ching, (pfeifen)

und s’git mit dr Tafele mou öbbe uf e Gring.

 

worum,worum,worum,worum,

isch s’Rössli aabebrönnt.

 

dr Schwaller Hugo wott

sich no einisch troue,

und am aute Platz

es neus Cavallo boue,

ir Zwüschezyt isch är

uf em Pöschtli druff,

und schlarpet mit de Finke

diräkt is Puff.

das isch ihm vergönnt, (pfeifen)

äs isch trotzdäm schad het letscht Johr s’Rössli brönnt

 

Bierli, Schnaps, Chips,

es Lutz het si Reitz,

mir freue üs uf die nöi Rössli-Beiz, Rössli-Beiz

 

Dr Letscht

Im Rössli lit e Totekopf

im glöschne Abbruchschutt

Polizei merkt schampar schnäu

dä Ma isch gloub kaputt

isch’s äch e Unfau oder Mord

im Effekt Umbracht

nei dä Uralt-Gascht dä wartet

immer no uf’s z’Nacht.

 

D’Ungersuechig isch verbi

dr Meyer Douf chas ou nit si.