2005
Verse
Es Unwätter (SBB)
Im letschte Johr het's ghaglet gha,
milione Franke Schaade
Haguchörner wie Tennisbäu,
si cho vo obe n'abe
dr Schaade chönnti chliner si,
ei Idee die hätti
löht s'nöchschte Wätter z'Deitige abe,
die hei scho aui Näggi.
Dr Bachbumele-Usflug
Dr Willi seit am morge früeh,
ha überhaupt nüüt gschloofe
dr Jürgu schnarchlet wie verruckt,
die ganz Nacht d'Ouge offe
dr Jürgu chunnt jetz ou derhär,
verschloofe über d'Ohre
die ganzi Nacht nüt gschloofe gha,
Willi schnarchlet wie ne moore.
Memuare
D‘Monica Lewinski seit,
dr Bill heig si betrooge
Är heigi seie ganz fescht gliebt,
im Buech do heig är glooge.
Das sig doch aues Hafechäs,
dr Clinten meint ganz troch
Das geit mi aues nüt meh a
und zuedäm bloos mir doch.
Dr Goldfond
Olympiade in Athen
hei d'Schwizer einisch Gold,
Mir hei s' Gfüehl gha,
de Athlethe sigi s'Glück nid hold,
Derbi isch nur dr Couchepain tschuld,
d' Schportler tüe das länke
si hei Angscht, si müesse s'Gold,
am AHV-Fonds schänke.
D’Ibürgerig
D'Secondos chöi nid Schwizer wärde,
aues isch bachab
d' SVP verhindret das,
die luege für d'Heimat
Mir si froh um ihre Kampf,
das politische Gschtocher
süsch hätte mir im Bundesrot
nur Schwoobe wie dr Blocher.
Es nöis Stadion
In Züri hei si Unique bout,
en Immobilie-Bande
leider tüe die meischte Flüüger,
in Züri gar nid lande
Mir gäh Züri no ne Chanc,
mir säge woruf mir ziele
die chönnte doch im Törminal,
es EM-Mätschli schpiele.
Wenn Nass wirsch
In Portugal wird Fuessball gschpüut,
s’Fieber isch uusbroche
S’Wätter isch dört wunderbar,
ebe scho fasch z’troche
S’dusche isch verbote gsi
und das isch sicher wohr
Für’s wäsche frogsch dr Alex Frei,
dä netzt dir aui Hoor.
Express-Poscht
In Luterbach, heit's sicher gmerkt,
git's jetz kei C-Poscht meh
nüt meh het jetz 4 / 5 Tag
vo A bis nach B
si Hocherfreut, s' isch super Guet,
überhaupt ke Hohn
nei dr Flury vor Schnägge-Poscht
zieht z'Deitige jetz Lohn.
Es Grüsch
S’Krummenacher Sandra het
es Grüsch i ihrer Dusche
e Wasserleitig sig defekt
drum g’hör me doch das Rusche
s’Problem isch de es angers gsi
ke Wasserleitigs-Schade
s’Elektrobürschtli das für Zähng
isch gloffe ir Schublade.
S’Gschänk
Dr Moser Hans bout d'Chuchi um
är fingt sig a der Zyt
d'Schrinerei schänkt ihm
es Taburet sig ganz solid
is Schloffzimmer stöut är dä Stueu
begründig isch zum Schreie
wenn's Trudi z'Nacht ei Meis ablöng
hock är ir erschte Reihe.
Dr SVP-Chef
Dr Ueli Muurer a de Schtöck
e Zägg dä heig ne bisse
Dr Blick, dä macht es Interviu
dä het sech schier drumm grisse
Was üs persönlech sehr enttüscht
und das de wie ne moore
Hei doch die Zägge i dr Schwiz
e jede Schtouz verloore.
Dr Muldeplatz
Dr Rüetschli fingt im Gmeindeschrott
es uuralts Panzer-Gschoss
die söue das cho hole cho
mit schprängkundigem Tross
si si de choh zum Wärchgebäude
si ganz traumatisiert
em Puff a isch die Bombe scho
uf em Schrottplatz explodiert.
Wenn chaut hesch
Dr Tank isch läär und d’Heizig uus
s’isch chalt uf dr Verwaltig
d Rüetschli dä het’s Oel nid brocht
das isch eifach kei Haltig
es chönnt jo si, dr Max het gseit
wenn’s chalt isch tüe si schaffe
und hei dür das e kei Zit meh
zum Fäischter use z’gaffe.
ÄÄÄÄÄhhhh
Hesch schtändig gäng ei Stimm im Ohr
es Glaver fasch es Gschtürm
vo däm wo ghörsch hesch mit dr Zyt
im Hirni obe Würm
wenn jetz kapiersch um was das geit
de bisch Du ou scho gsi
am Fritig-Bier und Bader Andi
hockt Dir vis à vis.
nit Gwüsst(ei du schöne)
s’von Arx Barbara nit Dumm
gseht z’Däredinge am Brüötsch si Hung
is Outo glockt a Sässu bunge
he Toni lueg di Hung ig gfunge
dä seit und macht en ärnschti Mine
dä Hung das isch bestimmt nit mi ne.
los Babs Du weisch haut nüm was louft
ig ha min Hung scho lang verchouft.
Vergässe
D’Füürwehr het en Üebig g’ha
im OZ denn d’Ching chöme dra
die müönd i d’Zimmer ine liege
s’wird grettet de die Chinder-Clique
sie si de scho bim Bierli gsässe
und gmerkt mir hei e Goff vergässe.
Vom rüefe scho e trochni Zunge
e Putzfrou het das Ching de gfunge.
Nit ufpasst
Im EM-Zäut dr Marco schreit
die Dütsche hei es Gool erzielt
är meint die zwöiti Chischte gschosse
heig Olli Kahn mit de Genosse
söttsch haut s’nöchscht mou besser gugge
sisch blos vom 1-0 g‘si Zytlupe.
Eifachi Lit die Basler-Tschingge
die g‘hasch mit Replay gäng no lingge.
Morgetoilette
Am Morge früeh mi chrützt es Outo
dr Bernasconi fahrt is Büro
dr Peter fummlet a sim Chopf
drückt dä is Ohr dr Natelchnopf
dä tuet jo nit telefoniere
är isch grad dra si Gring z‘rasiere.
Macht dä sich für’s schaffe bereit
oder chunt er Hei vor Nachtarbeit.
Wenn d’Frou Lehme fahrt(O Morgerot)
OhMorgerot, oh Morgerot
statt Bräms drückt s’Vreni s’Gas ir Not
dr Othmi grad am Ischtige
e Gump nimt s‘Outo hingere
die offni Tür git ihm e Stoss
dr Schläfli landet uf dr Stross
sisch abnormau, sich abnormau
ei Tag muess dä de i Spitau.
Wenn e Weidebach parkiert
O Morgerot, o Morgerot
Dr Mäni spüut Outo-Pilot
i Püuz hei si zwar wöue goh
doch s’Leni unger s‘Outo cho
die Wade het derbi lo goh
dä Dotsch darf dört nit ane stoh.
Silenzium, Silenzium,
dr Mäni fahrt sis Leni um
Üs Stinkt’s (Sex, Florian Ast)
Wäh, wäh, wääh
Wäh, wäh, wääh
In Luterbach schtinkts, me chas chum meh ushalte
üs chehrts dr Mage wäge däm gruusige Gschtank
ob Attsiholz, Blocher, Borregaard, aus bim alte
d’ Schtüüre göh zrugg, dr Gruch dä tüe mir bhalte, halt de
Refrain:
Gmeinrot - zeig Outorität
Mir wei Läbesqualität
Bi üs schtiiiinkts
vom Morge bis am Obe
Bi üs schtiinkts
gruusig wie ne Moore
Es schmöckt nach fuule Eier
Do würgt sogar dr Geier
Gmeinsarbeiter müesse sich lo operiere
si sötte Naselöcher wienes Suugrohr ha
si müesse chönne dr Schtinker eruiere
isch es Kläralag oder eine bim grilliere, huere niere
(Refrain)
S’ git Lüüt die säge, s’ schtinke chunnt vom Schumi
bim Bärgwind chöm dr Gschtank vo ihm derhär
är bruuchi halt z viel Tinte, zweni Gummi
wenn Schiisdräck schribsch, schtinkt’s haut wie us em Guli, cheibe Suli
(Refrain)
Zwe Alt-Gmeinröt tüe über d’ Press laviere
beschwäre sich über e duurend Gschtank
als Politiker hätte sie chönne reagiere
Scheller und Schturzi, z’ schpot mit reklamiere, fuli Giele
(Refrain)
Liebe Max, du chlopfisch jetze d’ Finke
das cheibe Gschtürm geit üs ou uf e Närv
Du tuesch di vo auem jetz uusklinke
nid nur Borregaard, ou angers cha eim schtinke, zum abwinke
(Refrain)
Üsi Chrämer (Hansjakobli und s’Babettli)
Ir Drogerie dört git’s Narkotikum
Schmärtzmittu, Saubi oder Valium
dr Helmut schnorret wie besässe
die Pille het dä säuber g’Frässe.
Bim Bader Hebu choufsch Salami
paar Plätzli, Servelat das man y
wo är de seit was das de choschtet
ig gmeint es ganzes Söili boschtet.
Zum Rüetschli Sepp, ig bruch Houzchohle
die chasch du eifach bi ihm hole
s’Gotti seit „isch furt“, het dummi Röschti
„Bringt Öu is Buff eh eh is Pöschtli“.
Bim Kofmäu go ig schnäu i Lade
ig bruche Farb für mi Fassade
ig g’seh nur eis, d’Frisur die Geili
das isch am Jörg sis fausch Hoorteili.
Bruchsch Yoghurt, Müuch oder chli Anke
ir Chäsi chasch das aues tanke
dr Chlaus isch furt mi duet’s nit störe
süsch wär ig hüt no dört am Schnöre.
Bim Beck no Brot organisiere
duss darfsch nur no 4 Schtung parkiere
dr Nick fingt’s guet für sini Chunde
sis Brot sig glich hert nach vier Stunde.
Ir Bank due ig am Tschui rüefe
„Du chasch mer s’Konto überprüefe
los gang doch wäg a anger Schauter
är bruch jetz Pouse i sim Auter.
Bim Wysseier schnäu inne Furtze
deheim gäbs schtändig „prätsch“ e Churtze
dr Fuchser meint de nit im böse
Sexual-Problem chön är nit löse.
Zum Barni schnäu goh Cherze choufe
do chunt si Frou grad dure z’loufe
ig luege uf das churze Röckli
und überchume grad es Stöckli.
Zum TV-Müller latsch ig ine
dr Fährnseh isch kaputt weisch mine
ig bstöue mir drum grad e Nöie
bis dä chunt tüe Bure zwöi mou Heue
Ig sött mi wieder mou frisiere
bim Andrea schnide, Kopf massiere
ig chume use s’Hirni suured
die het mi totau z‘Bode gschnuuret.
Was aus bim Coiffeur so chasch ghöre
das ma jo chum i mini Röhre
jetz bin ig geicht vor Samphoduschi
erträge ou no s’Zuber Uschi.
Drumm ab uf Poscht i d’Schauterhaue
dört schtöh si Schlange mir chunt Gaue
dr Chef sött ig ha ums verrecke
dr Othmi duet sich schön verschtecke.
No schnäu i d’Metzg weisch die vom Bisig
mi Hunger isch jetz würklich riesig
s‘Poulet lit uf im Mage unge
das het haut scho fasch z‘vüu Flugstunge.
Zum Schluss wod ig no s’Glück erzwinge
is Bistro no mis Füdle schwinge
ig chrützle s’Lotto a ganz lässig
s’Niveau dört drinn isch würklich mässig.
Mir tüe dä Ichouf jetz abschliesse
wei niemer em i Rügge schiesse
in Luterbach isch nüt vergäbe
doch chasch immer öbbis erläbe
Luterbacher-Politiker (d’Füchsli)
Wo mir no chli si gsi het d'Politik no öppis golte
hüt hesch es Problem aus Gmeinderot di z'Oute
früecher het me Dütsch und Dütlech gredet mitenang
hüt bruuchsch e schpitzi Fäädere und nümme vüu Verschtang
hüt buuchsch nümm vüu Verschtang (pfeifen)
hüt bruuchsch e schpitzi Fädere, derfür nümm vöu Verschtang
worum, worum, worum, worum, het niemmer me Mumm.
Wenn öppis chli chrumm louft und das tuet di de Schtööre
de muesch's nid besser mache, sondern hesch e grossi Röhre
am gschitschte isch de Chlaage, nur e so blibsch Fit
ou en Art vo Kolle-giali-tätsprin-zip
so blibsch du hüt Fit (pfeifen)
hüt bruuchsch e schpitzi Fäädere, e so bliibsch du hüt Fit
worum, worum, worum, worum, het niemmer me Mumm.
Wenn e chli e gschickte bisch, de chasch du aues schriibe
wenn ou nid aues schtimmt, s'wird öppis hange bliibe
Hugo, du machsch dir politisch nume Finde
uf die Art findisch du beschtimmt e keni Fründe
so fingsch du keni Fründe (pfeifen)
du hesch e schpitzi Fädere derfür e keni Fründ
worum, worum, worum, worum, het niemmer me Mumm.
Du füehrsch kei Kampf wie dr Robin Hood
im Gägeteil, mir finge das völlig absurd
würdsch gschiider dini Kompetänz für angers iisetze
anschtatt gäge aus und jede s’ Mässer z’wetze
mir tüe dir das rote (pfeifen)
mir hei e schpitzi Fädere und erscht no vöu Verschtang
Dorum, dorum, dorum, dorum, dorum,
Hei mir haut dr Mumm!
Mir hei dr Mumm!