2003

Verse

 

 

 

 

Mir si früschi

Dir gseht üs hür s‘ erschte Mou,

üs git’s noni lang

mir mache Schnitzubänk für euch

und bringe die mit gsang

Die Gruppe heisst Bachbumele,

drum schpitzet jetzte d‘ Ohre

Wos z’Luterbach und i dr Schwiz

mängisch tuet rumoore

 

dr Architekt

Dr Schumi bschtöut es chliises Loch,

är wot es Hüüsli boue

Dr Chäuer wird nid ganz so gross,

d’Finanze müesse houe

Doch plötzlech git’s es grosses Loch,

für e Hugo isch’s blamable

Är het dr Baggerfüehrer haut

am fausche Ort lo graabe

 

Aute Mischt

Dr Moser Hans git für’s Züghuus

ke Gäud, s’gitt e Boykott

Dr Schtaat söu gfäuigscht säuber luegezu sim aute Schrott

Und s’Trudi seit vo ihm ou gäng,

mir wüsse nid meint’s fräch

Äs müessi jo ou säuber luege

zum Hans, däm aute Bläch

 

 

 

 

 

 

2  Kurt

 

   0    Jörg

 

     0    Jürg

                  

       3        Willi

 

 

 

 

 

 

 

Hochwasser

Im Dütsche het dr Schröder wieder

d‘ Bundestagwahle gwunne

im Hochwasser sig är am Beschte

obenuffe schwumme

dr Hediger wär Vice-Amme

mit Schtimme gang e Huufe

wenn dank ihm ganz Deitige

im Wasser würd versuufe

 

3 mou zahlt

Im Outo fahrt der Balmer Gerold

plötzlech git’s e Blitz

dä chehrt grad um, bi gar nid z’schnäu

das isch e blööde Witz

es blitzt nomou, chehrt wieder um

und frogt de d’Polizei

Dir heit drümou ke Gurt montiert,

macht hundertachzig Schtei

 

dr Schloffwandler

S’isch wichtig uf dr Veterane Reis

das de masch trinke

üse Willi tuet nach em Bier

ganz sanft is Bettli sinke

ir Nacht e Druck, zum Bettli us,

im Dunkle ghörsch ne grunze

ke Liecht, ke Schüssu und huere äng

tuet fasch i Chaschte brunze

 

 

 

Wenn aut usgsesch

9 hundert und füfzig Johr

hei mir scho chönne fiire

dr Kofmäu Wisu aus OK-Präsi

muess schaffe, cha nid liire

am Fescht froge ihn vili Lüt,

s’isch wohr, är gseht so dri

bisch Du jetz würklech i dr Gemein

sit tuusig Johr derbii

 

 

e grüene Duume

Caccivio Willi super schlau

dä wot si Rase pflege

ig bruch öppis gäg das Gjät

tuet är sich überlege

Das Mittu isch de aber lätz,

das tuet sich sofort räche

aus kaputt, dr Rase brun

chasch aues umeschtäche

 

 

dr Botschafter

Dr Josef Deiss, dr Bundesrot,

är isch schuurig muff

Dr Thomas Borer macht im Dütsche

es einzigs riisigs Puff

Do geit das nid, är müess jetz goh,

d’Shawne het schüüli glitte

Är heig ir Botschat z’Nacht emou

en angeri Schtute gritte

 

 

s’Grosi

Die junge Lüt, die hei ke Fröid

si aui gäge Schtaat

si keini Patriote meh,

mir finges eifach schaad

es Grosi lachet wie ne Chäfer,

macht nie e suure Schtei

treit säubverständlech Schwizerfarbe,

Michelin Calmi-Rey

 

 

Üsi Uhr

I hundert Milione Johr

geit s’Wasser us uf Ärde

jo was söu us dr Wasseruhr

bim Gmeinshuus vore wärde

üse Max seit, keis Problem

dir chöit ruehig bliibe

s’Travino Greti het gnue Wii

für die Uhr z‘ betriibe

Zollalarm

Am Zoll z’Brasilie herrscht es Chaos,

es chöm e Terrorischt

är sigi tarnet als en ganz

e gwöhnleche Tourischt

Zöllner mache fasch id Hose,

är isch dr Schrecke aller

Do chunnt är jetze gäge Zoll

es isch dr Hugo Schwaller

 

 

Hugo-Speziau

Do schtoht är jetze vor em Zoll

mit Hoseseck, zwe volle

dr Zöllner dänkt, dä gueti Ma

het öppis zum verzolle

si si erschtunt über d’Ässgwohnheite

vo de Lüt isch Schwiz

het är doch beidi Seck ufgfüllt

mit Hundebisquits

 

 

dr Streik

D’Bouarbeiter mache Schtreik,

d’Bouschtöue si läär

Wenn sie nid zur Arbeit göh

für au wird s’Lääbe schwär

Wenn üse Gmeinrot würde schtreike

do müesst dir nid lache

gar niemmer würdi das de gseh

wenn schtreiksch muesch vorhär schaffe

 

s’rote Wasser

Dr Bader Thomi, e Schportskanone

solid und ohni Laschter

rüeft einisch am Morge sorgevou -

wieso isch’s rot im Wasser

bim Schnider Urs und im Schpitau

wird s’Bluet im Urin gmässe

Plötzlech chunnt’s am Thomi z’Sinn

ha Randesalat gässe!

 

 

Frau am Sreuer

S’Barbara Hohl, im Grüttbach wohnt’s

e Linggi mit Finess

loht s’Outo uf dr Rampi schtoh,

zum Briefchaschte im Schtress

s’Outo fahrt die Rampi ab

und tätscht is Tor, kei Kohl

los Barbara, mir wüsse jetz

worum du heissisch ”Hohl”

 

 

 

 

s’SVP

Ir SVP het’s Manne drinn

wie dr Bertoluzzi

die hei e sones riese Ding,

die passe i kes ............

Bim Blocher isch das nid dr Fau

es isch nid zum Flachse

är seit jo vo sich säuber gäng

”mir isch e keine gwachse!”

 

dr Bankverwauter

D’Reiffisebank in Gerlafinge,

die wird Überfaue

s’Gäud i Sack süsch no e Wunsch,

de Röiber heig das gfaue

in Luterbach passiert das nid,

dr Tschui wird nie gschtört

bis dä wäg Röiber s’Füdli lüpft,

isch d’Schmier scho längschtens dört

 

d’Würmbader Schläfli,Fluri

Füf Johr göh dr Koni und dr Pöi

uf d‘ Mäuchseefrutt

Und tüe dört ei Wuche lang

gäng Fische, geisch kaputt

Letscht Johr isch es de passiert,

keis Unglück, müesst nid bange

Nei, die zwe hei s‘ erschte Mou

es Fischli gfange

 

blööd gange

Somaini Elian s’isch wohr

äs ghört schampar schlächt

mäudet sich bim Dokter aa,

das isch sicher rächt

dä luegt mit Liecht und het de s’Gfüöu

är sig nid vo Sinne

Dir heit no gäng und merket’s nid,

Ohrewatte dinne

 

E super Schütz

Dr Gmeinrot schiesst im Schützehuus

wie im Militär

Nur bim Simon Bänz geit’s dumm

si Schiibe, die blibt läär

dä gheit fasch zu dr Schtellig us

het s’Gwehr ganz schreg ir Hang

und balleret mit einre Fröid

i Chlikaliberschtang

 

 

 

 

 

 

Dr nöi Gmeinspräsident

Im Dorf schtoht z’mitts es Gmeindehuus

Dr Wittwer Max luegt öppe druus

wie’s sine Schöfli hüt so geit

ob d’Sunne schiint oder’s öppe schneit

I drissig Johr mir chöme druus

luegt ganz en angre Gring dört druus

Villich isch’s jo dr Bader Andi

regiert das Dorf mit sinre Bandi

 

Und Gmeinsversammlich isch im Ross

Das Bier chasch suufe hemmigslos

 

Skandau um Andi

 

 

Wär wär no fähig für das Amt

villicht d’Morini, nei verdammt

mit ihrem cheibe Chuderwäusch

weisch gar nid ob e Schwizre wäusch

Do mäudet sich no d’Hanfpartei

es Mitglied wäri ou no frei

dr Ritschard Sämi sigi das

är rouchi nur no säute Gras

 

Ou das isch Mischt, säg nei ganz rasch

süsch schtinkts im Gmeinshuus gäng nach Hasch

 

Skandau um Sämi

 

 

Dr Rüetschli Sepp aus Kandidat

übernimmt sofort das Gmeinsmandat

Dä würd de abe mit de Schtüüre

Derfür muess aus mit Chohle füüre

Und d’Wasseruhr das sig es Glöu

Die muess de loufe mit Heizöu

Für’s aute Ise das isch klar

Zausch de e Pris wie Kaviar

 

Bi ihm ufrume isch nid blööd

Das mache de nur no Gmeinröt

 

Skandau um Seppi

 

 

 

 

Do mäudet sich bigoscht e Schtimm

vom Vorhouz use, jetz wird’s schlimm

E Luterbach s’geit nid ohni

Es isch dr Jung vom Fluri Koni

Dä wet sis Mu ou dinne ha

Für das sig är dr richtig Ma

Är schnorret vöu, do het är Rächt

Doch was me ghört isch meischtens schlächt.

 

Die Wau vom Koni wär Riskant

Besser isch’s mir lös vakant

 

Skandau um Koni

 

 

Dr letschti Schrei jetz loset zue

Dr ganzi Tag heig dä si Rue

Dr Dreier Othmi, Margeschef

Dä könnt das Amt us em Effeff

Statt Express, Päckli oder Brief

Geit jetz ir Gmein grad aues schief

Das macht doch nüt, diet ihm nid weh

Das könnt är no vor PeTeTe

 

Los Othmi chum mir mache Proscht

Doch blib du lieber bi dr Poscht.

 

Skandau um Othmi

 

 

 

 

Di Chüngu und dr Kogler

 

Wenn du für dini Chüngu

e Schtallig wettisch boue

de hesch du es Problem

wöu niemmer tuet dir troue

 

E sone Chüngu schtinkt und macht e huere Lärm

Em Nochber chehrts scho nur bim dänke dra d‘ Gedärm

 

Niemmer isch derfür - pfeifen

 

E Chünguschtau, do isch doch würklech niemmer derfür

 

worum, worum, worum, worum, worum, worum, worum

tüe aui so dumm ?

 

Wenn dr Kogler wott in Luterbach

es Sagiwärch go boue

de het är kes Problem

wöu dämm tüe aui troue

 

Es paar hundert Arbeitsplätz ligge do drinn

Mehrverchehr, Lärm und Gschtank, das isch doch nid schlimm

 

Aui si derfür - pfeifen

 

Es Sagiwärch, so isch doch würklech aus derfür

 

worum, worum, worum, worum, worum, worum, worum

tuet do niemmer dumm ?

 

 

Die verantwortlech Lüt

si zum Kogler hei go frässe

Üsi Politiker

tüe ihm das nid vergässe

 

Är isch do zu ihne so ne Liebe gsi

Eine wo bewirtet wird vergisst das ni

 

Dorum si si derfür - pfeifen

 

dorum, dorum, dorum, dorum,

dorum, dorum, dorum

tuet bim Kogler niemmer dumm!

 

 

So blibt haut dä Chüngu

e ganze arme Tropf

ob Schnee oder Rääge

het kes Dach übrem Chopf

 

und d’Luterbacher löh dr Kogler ou nid loh gwähre

är cha jo schliesslech nid s’ganze Dorf ernähre

 

wär isch de no derfür - pfeifen

 

no meh Lärm und Gschtank

do isch doch niemmer derfür

 

dorum, dorum, dorum, dorum,

dorum, dorum, dorum

tüe mir bim Kogler dumm